जर्मनीका राजनीतिज्ञको हत्याको षड्यन्त्र रचेको आरोपमा एक व्यक्ति पक्राउ

बर्लिन । जर्मनीको प्रहरीले पूर्व चान्सलर एन्जेला मर्केल र ओलाफ स्कोल्जसहित केही राजनीतिज्ञहरूको हत्या गर्न ‘डार्कनेट’मा अनलाइन कल गर्ने एक व्यक्तिलाई पक्राउ गरेको छ ।

अभियोजनकर्ताहरूले विज्ञप्तिमा भनेका छन्, ‘आंशिक नाम मार्टिन एस रहेका संदिग्ध पोलिस मुलका जर्मन नागरिकलाई सोमबार राति पश्चिमी शहर डर्टमन्डबाट हिरासतमा लिइएको थियो।’

अनुसन्धानसँग निकट स्रोतले एएफपीलाई दिएको जानकारीमा भनिएको छ, ‘एक्लै काम गरेका ती व्यक्ति दक्षिणपन्थी षड्यन्त्र सिद्धान्तवादी आन्दोलनसँग जोडिएका थिए र मर्केल र स्कोल्ज उनको ‘आक्रमणको निशानाको सूची’मा थिए।’

ती व्यक्तिले गत जुनदेखि सार्वजनिक व्यक्तित्वहरू र सरकारी अधिकारीहरूमाथि आक्रमण गरेको आरोप लगाइएको सरकारी अभियोजकको कार्यालयले जनाएको छ।

उनले विस्फोटक उपकरणहरू निर्माण गर्न दिएका निर्देशनहरू पनि प्रकाशित गरेका थिए र हत्याको लागि ‘इनाम’ को रूपमा प्रयोग गर्न क्रिप्टोकरेन्सीमा चन्दा अनुरोध गरेका थिए।

अभियोजनकर्ताहरूले भनेका छन्, “उनले ‘आफैंले सुनाएको मृत्युदण्डको सजाय’ र ‘सम्भावित पीडितहरूको संवेदनशील व्यक्तिगत तथ्याङ्क’ पनि पोस्ट गरेका थिए।

उनीमाथि आतङ्कवादलाई आर्थिक सहयोग गरेको र राज्यलाई खतरामा पार्ने उद्देश्यले हिंसा भड्काउने लगायतका आरोपमा अनुसन्धान भइरहेको छ।

अभियोजनकर्ताहरूले भनेका छन्, ‘मार्टिन एसलाई मंगलबार न्यायाधीशको अगाडि ल्याइएको थियो र पूर्व–परीक्षण हिरासतमा राखिएको थियो।’

यस बिषयमा स्पिगल अनलाइनले लेखेको छ, ‘संदिग्ध ४९ वर्षीय ती व्यत्तिले न्यायाधीश र अभियोजनकर्ताहसहित २० लक्ष्यहरू सूचीबद्ध गरेका थिए, जसलाई उनले ‘हत्या राजनीति’ को लागि दोषारोपण गरेका थिए ।’

उनले प्रयोग गरेको साइट उग्र–दक्षिणपन्थी सामग्री र षड्यन्त्र सिद्धान्तहरूले भरिएको पाइएको थियो भने, केही कोरोनाभाइरस महामारीसँग सम्बन्धित बिषय पनि थिए।

जर्मन अधिकारीहरू ‘रेइचका नागरिक’ वा ‘रिचस्बर्गर’ भनेर चिनिने षड्यन्त्र सिद्धान्तवादी आन्दोलनको बिरूद्ध बढ्दो रूपमा अघि बढेका छन्।

आधुनिक जर्मन गणतन्त्रको वैधानिकतालाई अस्वीकार गर्ने यो आन्दोलनलाई लामो समयदेखि असन्तुष्ट र अनौठो समूहको रूपमा खारेज गरिएको थियो, तर अहिले यसलाई जर्मन अधिकारीहरूले सुरक्षा खतरा मानेका छन्।

सन् २०२२ मा एक पूर्व सांसद र पूर्व सैनिकसहित एक समूहका सदस्यहरू संसदमा आक्रमण गर्ने, सरकारलाई अपदस्थ गर्ने र कुलीन तथा व्यापारी राजकुमार हेनरिक तेह्रौं रेउसलाई राज्य प्रमुखको रूपमा स्थापित गर्ने षड्यन्त्रको आरोपमा पक्राउ परेका थिए।