हामीलाई नाङ्लो पसल खोल्नु छैनः सुदन किराँती

काठमाडौँ । प्रगतिशील लोकतान्त्रिक पार्टीका नेता सुदन किराँतीले पार्टीभित्र लामो समयदेखि नेतृत्वको पुस्तान्तरण र पार्टी रूपान्तरणको पक्षमा उठाएको मुद्दा सुनवाइ नभएपछि विद्रोह गरेको बताएका छन् ।

आइतबार राष्ट्रियसभा गृहमा पार्टी एकता सभालाई सम्बोधन गर्दै किराँतीले ३७ वर्षसम्म नेतृत्वमा रहेकाले जेनजी विद्रोहलाई अस्वीकार गरी वृद्धाश्रम बनाएकोले विद्रोह गरेको बताएका हुन् ।

उनले जेनजी युवाहरूको सडकमा रगतका टाटा सुक्न नपाउँदै प्रतिक्रान्तिको हुङ्कार दिन थाल्नु दुःखको विषय भएको बताए ।

उनले भने, ‘हामीले महाभारतका यदुवंशी सेना रोजेनौँ । हामीले बाबुराम, जनार्दन, राम कार्की र ओजस्वी भट्टराईजस्तो कृष्ण रोज्यौँ । हामीले लामो समयदेखि पार्टीभित्र पुस्तान्तरण र रूपान्तरणको मुद्दा उठायौँ । तर ती ठूला पार्टीका नेताहरूले हाम्रा मुद्दालाई वृद्धाश्रम खोल्नुभयो ।’

उनले आफूहरुले एक थान पार्टी मात्र खोल्न नचाहेको बताए । उनले भने, ‘हामीलाई नाङ्लो पसल खोल्नु छैन। जनताको सेवा गर्दै समस्या समाधान गर्ने विचार विधिसहितको शक्ति निर्णय गर्न खोजेका छौं।’