कांग्रेस र नेकपा कर्णालीमा नयाँ सरकार गठन गर्ने गृहकार्यमा

वीरेन्द्रनगर। कर्णाली प्रदेशमा प्रमुख प्रतिपक्षी दल नेपाली कम्युनिस्ट पार्टी (नेकपा) र नेपाली कांग्रेसले नयाँ सरकार गठन गर्ने गृहकार्य थालेका छन्। मुख्यमन्त्री यामलाल कँडेलको विकल्प खोज्दै कांग्रेस र नेकपाले सहकार्य गर्दै नयाँ सरकार बनाउने तयारी गरेका हुन्।

गत ३१ असारमा सत्तासाझेदार दल कांग्रेसका चार मन्त्रीले प्रदेश सरकारबाट राजीनामा दिएपछि अल्पमतमा परेका मुख्यमन्त्री कँडेलविरुद्ध ३२ असारमा कांग्रेस संसदीय दलका नेता जीवनबहादुर शाहीलाई मुख्यमन्त्रीमा अगाडि सार्दै नेकपाका ११ र कांग्रेसका पाँच गरी १६ प्रदेश सभा सदस्यले अविश्वासको प्रस्ताव प्रदेश सभा सचिवालयमा दर्ता गराएका थिए।

उक्त प्रस्ताव दर्ता गरेको एक सातापछि सभामुख नन्दा गुरुङले यही ७ साउनमा बैठक बोलाएकी थिइन्। सभामुख गुरुङले बिहीबार (७ साउन) बोलाएको बैठक विशेष कारणवश बस्न नसकेको सूचना सार्वजनिक गर्दै यही ९ साउन दिउँसो ३ बजे बस्ने तय भएको जानकारी दिइन्।

कर्णाली प्रदेश सभामा नेकपाका नेता मंगलबहादुर शाहीले ३२ असारमा प्रदेश सभा सचिवालयमा पेस गरेको मुख्यमन्त्री कँडेलविरुद्धको अविश्वास प्रस्तावका पक्षमै मतदान गरेर नयाँ सरकार गठन प्रक्रियामा अगाडि बढ्ने बताए।

“हामी आफ्नो निर्णयका आधारमा अगाडि बढ्छौँ,” उनले भने, “अब कांग्रेसको नेतृत्वमा सरकार गठन हुन्छ। नेकपाले त्योभन्दा अरू फरक कुनै देखेको छैन र सम्भव पनि हुँदैन।”

कर्णाली प्रदेश सभामा कांग्रेसका प्रमुख सचेतक हिक्मत विष्टले नेकपासँग भएको समझदारीका आधारमै कांग्रेस अगाडि बढेको बताए। उनले भने, “नेकपाकै समर्थनमा हाम्रो दलको नेतालाई सरकारको नेतृत्व गर्ने सहमतिबाट मुख्यमन्त्री प्रस्ताव गरेर अगाडि बढेका हौँ। अब छिटै कांग्रेस र नेकपाको समीकरणमा नयाँ सरकार गठन हुन्छ।”

कर्णालीमा हाल ४० प्रदेश सभा सदस्य छन्। सरकार गठन गर्न २० सदस्य आवश्यक पर्छ। प्रदेशमा कांग्रेसका १५ र नेकपाका १४ प्रदेश सभा सदस्य छन्।