पूर्वराष्ट्रपति भण्डारीको पार्टी सदस्यता रोक्ने निर्णय सच्याउन माग गर्दै ईश्वर पोखरेलको फरक मत

काठमाडौं । नेकपा एमालेका वरिष्ठ उपाध्यक्ष ईश्वर पोखरेलले पूर्वराष्ट्रपति विद्यादेवी भण्डारीको पार्टी सदस्यता रोक्ने निर्णय सच्याउनुपर्ने भन्दै फरक मत प्रस्तुत गरेका छन् ।

बिहीबारको पार्टी सचिवालय बैठकमा फरक मत प्रस्तुत गर्दै पोखरेलले भण्डारीको सदस्यता खारेज गर्ने निर्णय संविधान, कानुन र पार्टी विधान विपरीत रहेको बताएका हुन् ।

पोखरेलले भण्डारीले राष्ट्रपतिको जिम्मेवारी पूरा गरेपछि पार्टी अध्यक्ष लगायत नेताहरूसँग निरन्तर संवाद गर्दै औपचारिक रूपमा पार्टी सदस्यता नवीकरण गरिसकेको तथ्य सार्वजनिक रहेको उल्लेख गरेका छन् ।

उनले भनेका छन्, ’पूर्व उपाध्यक्ष तथा पूर्व राष्ट्रपति कमरेड विद्यादेवी भण्डारीलाई पार्टी राजनीतिमा संलग्न हुन नपाउने गरी गरिएको निर्णय अस्वस्थ, स्वेच्छाचारी र राजनीतिक पूर्वाग्रहपूर्ण हो।’

उनले गत जेठमा भएको चीन भ्रमणमा भण्डारीले पार्टीको तर्फबाट प्रतिनिधित्व गरिसकेकाले त्यसले औपचारिक रूपमा पार्टी सदस्य रहेको पुष्टि गरेको उल्लेख गरेका छन् । पोखरेलले पार्टी विधानको धारा ७८ (१) अनुसार निर्णय सच्याउन माग गरेका छन् । एमालेको विधान महाधिवेशन शुक्रबारदेखि सुरु हुँदैछ ।